Shanxayda yer o‘pirilishi: jabrlanganlar yo‘q
Xitoyning Shanxay shahrida keng ko‘lamli yer o‘pirilishi sodir bo‘ldi. Bu haqda Zamin.uz xabar berdi.
Hodisa natijasida taxminan 10–20 metr kenglikdagi hududda yer cho‘kishi kuzatildi. Bu jarayon bir necha soniya ichida sodir bo‘lib, yo‘l qismlari, qurilish materiallari va vaqtinchalik inshootlar chuqurlikka qulab tushgan.
Rasmiy ma’lumotlarga ko‘ra, ushbu hodisa oqibatida hech kim jabrlanmagan. Hududda bo‘lgan haydovchilar va piyodalar o‘z vaqtida xavfsiz joyga ko‘chishga ulgurgan.
Shuningdek, qurilish maydonchasida ishlayotgan xodimlar favqulodda tartibda evakuatsiya qilingan. Dastlabki ma’lumotlarga ko‘ra, yer o‘pirilishiga metro qurilishi davomida olib borilgan ishlar va avvalroq aniqlangan suv sizib chiqishi sabab bo‘lishi mumkin.
Hozirda mutaxassislar hodisa sabablarini o‘rganmoqda va xavfsizlik choralarini kuchaytirish bo‘yicha chora-tadbirlar ko‘rilmoqda.
