Tolibon Valentin kuniga oid savdo va bezaklarni taqiqladi

14-fevral kuni Tolibon harakati vakillari Qobul va Hirot shaharlarida Valentin kuni bilan bog‘liq savdo va bezaklarni cheklash bo‘yicha chora-tadbirlar amalga oshirganliklari haqida xabar berildi. Bu haqda Zamin.uz xabar berdi.

Jumladan, Hirot shahrida ayrim gul do‘konlariga "Valentin taqiqlanadi" mazmunidagi e’lonlar yopishtirilgani, Qobulda esa savdogarlarga qizil atirgul, tabrik kartalari va qizil rangdagi bezaklarni sotmaslik haqida ogohlantirish berilgani qayd etilgan. Tolibon ma’muriyati vakillari ushbu bayramni "islomiy qadriyatlarga zid" deb baholamoqda.

Xususan, "Fazilatni targ‘ib qilish va yomonlikdan qaytarish" vazirligi vakillari Valentin kunini "axloqiy tanazzul" sifatida ko‘rib, uni G‘arb madaniyatiga taqlid deb hisoblashlarini bildirgan. Hozircha mazkur qoidalarni buzganlarga qanday jazo choralari qo‘llanishi haqida rasman ma’lumot berilmagan.

Shunga qaramay, kuzatuvchilar bu kabi cheklovlar asosan savdo nuqtalari va yoshlar orasida Valentin kuniga xos bo‘lgan an’analarga bosimni oshirishga qaratilganini ta’kidlamoqda. Ya’ni, bayramning o‘zidan ko‘ra uning ramziy atributlari nishonga olinmoqda.