Sobiq vazir Galushchenko chegarada qo‘lga olindi
Ukraina ommaviy axborot vositalarining xabar berishicha, sobiq energetika vaziri Herman Galushchenko 14–15-fevral kechasi davlat chegarasini noqonuniy kesib o‘tishga uringanida qo‘lga olingan. Bu haqda Zamin.uz xabar berdi.
"Ukrainskaya pravda" nashri siyosiy doiralardagi manbalariga asoslanib, Galushchenko poyezddan tushirilgani haqida ma’lumot bergan. Manbalarga ko‘ra, ushbu holat "Midas" ishi deb nomlanayotgan katta korrupsiya mojarosi fonida sodir bo‘lgan.
Chegarachilar Ukraina Milliy korrupsiyaga qarshi kurash byurosi va Ixtisoslashtirilgan korrupsiyaga qarshi kurash prokuraturasidan sobiq vazir chegarani tark etishga urinsa, zudlik bilan xabar berish haqida ko‘rsatma olgan. Shu sababli, vazirning harakatlari kuzatilib, u ushlangan.
Reuters axborot agentligi ham sobiq vazirning chegarada qo‘lga olingani haqida xabar tarqatdi. Hozircha qo‘shimcha tafsilotlar cheklangan, chunki tergov jarayonlari davom etmoqda va rasmiy izohlar to‘liq e’lon qilinmagan.
Ayrim nashrlar Galushchenkoning 2021–2025-yillarda energetika vaziri lavozimida ishlaganini va 2025-yilda qisqa muddat adliya vazirligini boshqarganini qayd etmoqda.
