BAAda Ramazonda ish vaqti 2 soatga qisqaradi
2026 yilgi Ramazon oyi munosabati bilan Birlashgan Arab Amirliklarida xususiy sektorda ishlovchi xodimlarning ish vaqti kuniga 2 soatga qisqartiriladi. Bu haqda Zamin.uz xabar berdi.
Bu haqda mamlakatning Mehnat resurslari vazirligi 12 fevral kuni rasmiy bayonot berdi. Odatda 8–9 soat ishlaydigan xodimlar Ramazon oyida 6–7 soatlik ish rejimida faoliyat olib boradi.
Belgilangan me’yordan ortiq ishlangan soatlar esa qo‘shimcha ish sifatida hisoblanib, alohida tartibda haq to‘lanadi. Shuningdek, korxonalarga ish jadvalini moslashuvchan qilib belgilashga ruxsat berilgan.
Masalan, masofadan ishlashni joriy etish yoki ish vaqtini qonunchilik doirasida o‘zgartirish mumkin. Davlat muassasalarida ham yengillashtirilgan ish tartibi joriy etiladi.
Bunga ko‘ra, dushanbadan payshanbagacha ish vaqti soat 09:00 dan 14:30 gacha, juma kuni esa tushgacha davom etadi. Biroq uzluksiz ish jarayoni talab etiladigan sohalar mazkur tartibdan mustasno hisoblanadi.
Mazkur qaror fuqarolarga oilasi, ibodat va ruhiy mashg‘ulotlar uchun ko‘proq vaqt ajratish imkonini yaratish maqsadida qabul qilingan. Astronomik hisob-kitoblarga ko‘ra, 2026 yilda Ramazon oyi BAA va boshqa musulmon davlatlarida 19 fevral kuni boshlanishi kutilmoqda.
