Hillari Klinton Trampning Ukraina siyosatini tanqid qildi
Myunxen xavfsizlik konferensiyasida AQShning Ukrainaga nisbatan siyosati yana muhokamalarga sabab bo‘ldi. Bu haqda Zamin.uz xabar berdi.
Demokratik partiyadan sobiq prezidentlik nomzodi Hillari Klinton konferensiyada AQSh prezidenti Donald Trampning Ukraina bo‘yicha siyosatini keskin tanqid qildi. Klintonning ta’kidlashicha, Tramp ma’muriyatining Ukrainaga nisbatan pozitsiyasi “sharmandali” bo‘lib, Kiyevni Rossiya prezidenti Vladimir Putin bilan kelishuvga majburlashga urinish axloqiy va tarixiy jihatdan xato hisoblanadi.
U Tramp va Putin o‘z manfaatlarini Ukraina xalqi azob-uqubatlari evaziga amalga oshirayotganini ta’kidladi. Sobiq davlat kotibi Ukraina bugun nafaqat o‘z hududlari, balki demokratiya, erkinlik va umumbashariy qadriyatlar uchun kurashayotganini qayd etdi.
Minglab insonlar hayotdan ko‘z yumayotgan bir paytda bu muammoga befarq bo‘lish xavfli oqibatlarga olib kelishi mumkinligini aytdi. Klinton, shuningdek, Trampni “G‘arb qadriyatlari”ga xiyonat qilganlikda aybladi.
U NATO nizomi, Atlantika xartiyasi va Inson huquqlari umumjahon deklaratsiyasini eslatib, bu prinsiplarning e’tiborsiz qoldirilishi jahon tartibiga zarar yetkazayotganini ta’kidladi. Trampning hokimiyat modeli Putinning rejimiga asoslanganini aytgan Klinton bunday rejimda yashashni hech kim istamasligini qayd etdi.
Ukrainaga nisbatan noto‘g‘ri qarorlar qabul qilinsa, bu Yevropa xavfsizligi va transatlantik ishonchga jiddiy zarar yetkazishi mumkinligi haqida ogohlantirildi. Konferensiyada bu masala atrofidagi xavotirlar aynan shu nuqtaga qaratildi.
