Japarov: Tashiyev davlat xizmatiga qaytmaydi
Qirg‘iziston prezidenti Sadir Japarov mamlakat Milliy xavfsizlik davlat qo‘mitasining sobiq rahbari Qamchibek Tashiyev davlat xizmatiga qaytmasligini qat’iy ta’kidladi. Bu haqda Zamin.uz xabar berdi.
Bu haqda u mahalliy axborot agentligiga bergan intervyusida ma’lum qildi. Prezidentning so‘zlariga ko‘ra, davlat lavozimlari va shaxsiy munosabatlar alohida masalalar bo‘lib, Tashiyev bilan do‘stlik munosabatlari saqlanib qoladi, ammo uni davlat xizmatiga qaytarish rejada yo‘q.
Japarovning aytishicha, u Tashiyevga sog‘lig‘iga e’tibor berish, xotirjam hayot kechirishni maslahat bergan. Shuningdek, prezident ba’zi guruhlarning yashirin faoliyatiga ishora qilib, bunday harakatlarga yo‘l qo‘yilmasligini aytdi va tergov idoralari vaziyatni tartibga solishini ta’kidladi.
Suhbat davomida jurnalist sobiq rahbar ketganidan keyin jinoyatchilik va korrupsiyaga qarshi kurash susayib qolmaydimi, degan savolni o‘rtaga tashladi. Japarov bunga javoban mamlakatda uyushgan jinoyatchilik yo‘qligini va bunday guruhlar qayta shakllanmasligini bildirdi.
Uning fikricha, 2020 yildan keyingi Qirg‘iziston hokimiyati jinoyatchilikka qarshi qat’iy pozitsiyada turib, kriminal guruhlar bilan til biriktirmagan. Korrupsiya haqida gapirar ekan, prezident bu muammoni butunlay yo‘q qilish qiyinligini, ammo uning darajasini pasaytirish uchun doimiy ishlar olib borilayotganini aytdi.
U korrupsiyaning iqtisodiy, siyosiy va boshqa ko‘rinishlariga qarshi kurash davom etishini ta’kidladi. Japarovning fikricha, jinoyatchilikka qarshi kurashda tezroq natijalarga erishilgan bo‘lsa-da, korrupsiyani yengish uzoq vaqt talab qiladi.
Shunga qaramay, bu boradagi ishlar izchil davom ettiriladi. Prezident huquq-tartibot idoralariga topshiriq berilganini ham qayd etdi: jinoyatchilik va korrupsiyaga qarshi kurash professional tarzda, shov-shuvsiz olib borilishi kerak.
Yakunda Japarov davlat lavozimlariga qaytish masalasi yopilganini, asosiy e’tibor esa tartibni saqlash va jinoyatchilikka yo‘l qo‘ymaslikka qaratilganini ta’kidladi.
