Rossiyada tomlardan qor tushishi 9 kishini hayotdan olib ketdi

Rossiyada bir hafta davomida tomlardan qor va muz tushishi natijasida 9 kishi halok bo‘ldi. Bu haqda Zamin.uz xabar berdi.

Bu haqda Rossiya Favqulodda vaziyatlar vazirligi matbuot xizmati TASS agentligiga ma’lum qilgan. Vazirlik xabariga ko‘ra, o‘tgan hafta davomida mamlakatning 32 ta hududida noqulay ob-havo sharoitlari kuzatilgan.

25 hududda tomlardan qor va muz tushishi bilan bog‘liq 60 dan ziyod holat qayd etilgan. Ushbu hodisalarda 24 kishi jarohat olgan, ulardan 9 nafari hayotdan ko‘z yumgan.

Mutaxassislar fuqarolarga binolar tomi va ayvonlari atrofida ehtiyotkor bo‘lishni, muz osilib turgan joylardan uzoqroq yurishni tavsiya qilmoqda. Hozircha ushbu hodisalarning batafsil tafsilotlari oshkor etilmagan.

Shunga qaramay, Favqulodda vaziyatlar vazirligi tomlarni o‘z vaqtida tozalash va xavfli hududlarni belgilash zarurligini yana bir bor ta’kidlagan.