Shvetsiya yevroga o‘tishni yana muhokama qilmoqda

Shvetsiyada milliy valyuta – kronadan voz kechib, yevroga o‘tish masalasi yana muhokama qilinmoqda. Bu haqda Zamin.uz xabar berdi.

Bu mavzu parlament darajasida ham jiddiy tus olgan. Liberallar partiyasi tashabbusi bilan yevroga bag‘ishlangan maxsus muhokama o‘tkazilishi belgilangan.

Deputat Sesiliya Rennning fikricha, dunyoda yirik davlatlar o‘rtasidagi raqobat kuchayib borayotgan bir paytda kichik iqtisodiyotlar uchun xavf-xatarlar ortmoqda. Shu sababli, Shvetsiyaning yevroga o‘tishi Yevropa davlatlari bilan siyosiy va iqtisodiy aloqalarni mustahkamlashga, shuningdek, valyuta masalalari bo‘yicha umumiy qarorlar qabul qilishda ta’sirini oshirishga xizmat qilishi mumkin.

Deputatning ta’kidlashicha, Shvetsiya NATOga a’zo bo‘lib, mudofaa sohasida Yevropa davlatlari bilan hamkorlikni kuchaytirgan. Ammo valyuta masalasida alohida yo‘lda bo‘lish mamlakatni umumiy tizimdan chetda qoldirishi mumkin.

Yevroga o‘tish esa savdo hajmlarini oshirish va investitsiyalarni jalb qilish imkoniyatini ham yaratadi. Milliy valyuta – kronaning barqarorligi masalasi ham muhokama markazida turibdi.

So‘nggi o‘n yillikda krona qiymatining sezilarli darajada pasaygani, global iqtisodiy o‘zgarishlar va Boltiqbo‘yi mintaqasidagi beqarorlik uning kursiga salbiy ta’sir qilayotgani qayd etilmoqda. Shvetsiyada yevroga o‘tish mavzusi birinchi marta ko‘tarilayotgani yo‘q.

2003 yilda o‘tkazilgan referendumda saylovchilar yagona Yevropa valyutasiga qarshi ovoz bergan edi. O‘sha paytda “yo‘q” natijasi ustun chiqdi.

Bugungi kunda esa geosiyosat, xavfsizlik, sarmoya va savdo masalalari bir-biriga chambarchas bog‘langan. Shu sababli Shvetsiyada yevroga bo‘lgan munosabat qayta ko‘rib chiqilishi mumkin.

Bu hali yakuniy qaror emas, lekin muhokamalarning boshlanishi kelajakda katta o‘zgarishlar uchun asos bo‘lishi mumkin.