Chelyabinskda erkak ibodatxonada ikki ayolga hujum qildi

Chelyabinsk shahrida 25 yoshli erkak ibodatxona ichida ikki ayolga pichoq bilan hujum qildi. Bu haqda Zamin.uz xabar berdi.

Voqea ertalabki ibodat paytida sodir bo‘ldi. Bu haqda Tergov qo‘mitasining hududiy boshqarmasi ma’lum qildi.

Hujum oqibatida jabrlangan ayollar kasalxonaga yotqizilgan. Ma’lumotlarga ko‘ra, ulardan biri yengil jarohat olgan, ikkinchisi esa operatsiya qilingan.

Voqea Vorovskiy ko‘chasida joylashgan Bibi Maryamning "Kutilmagan quvonch" ikonasi cherkovida yuz bergan. Jabrlanganlar orasida bir rohiba va ibodat qilayotgan ayol borligi aytilmoqda.

Hujum qilgan shaxs qo‘lga olingan. Tergov qo‘mitasining dastlabki ma’lumotlariga ko‘ra, erkak ayollarga arzimas sabablar tufayli hujum qilgan.

Huquq-tartibot idoralari xabariga ko‘ra, erkakning onasi mazkur ibodatxonada xizmat qiladi va uni o‘zi xizmatga olib kelgan. Shuningdek, hujum qilgan shaxs psixiatrik ro‘yxatda turishi aniqlangan.

Holat yuzasidan Jinoyat kodeksining 30-moddasi 3-qismi va 105-moddasi 2-qismi "a" va "i" bandlari bo‘yicha jinoyat ishi qo‘zg‘atilgan. Tergov davom etmoqda.