Zalujniy va Zelenskiy o‘rtasida ziddiyat kuchaymoqda
Ukrainaning Buyuk Britaniyadagi sobiq elchisi va mamlakat Qurolli kuchlarining sobiq rahbari Valeriy Zalujniy yaqinda Associated Press agentligiga bergan intervyusida prezident Volodimir Zelenskiy bilan bo‘lgan murakkab munosabatlari haqida ma’lumot berdi. Bu haqda Zamin.uz xabar berdi.
Zalujniyning ta’kidlashicha, ularning o‘rtasidagi ilk kelishmovchiliklar Rossiyaning Ukrainaga qarshi bosqinining dastlabki kunlaridayoq paydo bo‘lgan. Zalujniy 2022 yil sentyabr oyida yuz bergan bir voqeani eslab o‘tdi.
O‘sha paytda Ukraina qo‘shinlari shimoliy yo‘nalishda muvaffaqiyatli harakat qilayotgan edi. Ammo aynan shu vaqtda uning Kiyevda joylashgan idorasiga Ukraina Xavfsizlik xizmati xodimlari tintuv o‘tkazish uchun kirib kelgan.
Tintuvga asos sifatida mazkur manzilda jinoiy guruh boshqaruvidagi striptiz klub joylashgani haqidagi hujjat ko‘rsatilgan. Zalujniy bu voqeani "ochiqchasiga qo‘rqitish harakati" sifatida baholadi va prezident ofisi rahbari Andrey Yermakka qo‘ng‘iroq qilib, bunday harakatlar davom etsa, keskin choralar ko‘rishi haqida ogohlantirgan.
Zalujniy intervyusida 2023 yilgi qarshi hujum muvaffaqiyatsizligi sabablari haqida ham gapirdi. Uning so‘zlariga ko‘ra, dastlabki rejalar Zaporojiye yo‘nalishida kuchli zarba berib, Azov dengiziga chiqishni maqsad qilgan edi.
Ammo siyosiy rahbariyat resurslarni keng hudud bo‘ylab tarqatib yuborgani sababli hujum quvvati zaiflashgan. Zelenskiy esa bu muvaffaqiyatsizlikni ittifoqchilardan qurol kech yetib kelgani va askarlar sonining kamligi bilan izohlagan edi.
Shuningdek, Zalujniyning siyosiy reytingi yuqoriligicha qolmoqda. So‘nggi so‘rovnomalarga ko‘ra, aholining 23 foizi uni qo‘llab-quvvatlamoqda, Zelenskiyni esa 20 foiz respondent ma’qullagan.
Zalujniy hozircha siyosiy rejalari haqida gapirishni istamayapti va "urush tugamaguncha siyosatni muhokama qilmayman" degan fikrni bildirgan. Shu bilan birga, Ukrainada 2026 yil fevral oyida navbatdan tashqari saylovlar o‘tkazilishi mumkinligi haqidagi mish-mishlar hamon dolzarb bo‘lib turibdi.
Zalujniy va Zelenskiy o‘rtasidagi bu ziddiyatlar Ukrainadagi ichki siyosiy barqarorlikka qanday ta’sir ko‘rsatishi hozircha noma’lum bo‘lib qolmoqda.
