Qozog‘istonda mahsulot haqiqiyligini tekshirish osonlashdi
Qozog‘istonda xaridorlar uchun mahsulotning haqiqiyligini aniqlash endi yanada osonlashdi. Bu haqda Zamin.uz xabar berdi.
eGov.kz portali matbuot xizmatining ma’lum qilishicha, eGov Mobile mobil ilovasiga mahsulotlarni raqamli kod orqali tekshirish funksiyasi qo‘shildi. Bu yangi imkoniyat Naqty Onim xizmati asosida ishlab chiqilgan bo‘lib, raqamli markirovka tizimidagi ma’lumotlarga tezkor, qulay va bepul kirishni ta’minlaydi.
Endilikda mahsulotning haqiqiyligini tekshirish uchun tovardagi Data Matrix kodini skaner qilish kifoya. Ilova orqali mahsulotning haqiqiyligi, ishlab chiqaruvchisi, ishlab chiqarilgan sanasi va boshqa asosiy ma’lumotlarni bilib olish mumkin.
Ushbu funksiyadan ayniqsa qalbakilashtirish xavfi yuqori bo‘lgan tovarlar: dori vositalari, tamaki mahsulotlari va poyabzalni tekshirishda foydalanish mumkin. Muhim jihat shundaki, bu xizmat faqat majburiy raqamli markirovka talab qilinadigan va Data Matrix kodiga ega bo‘lgan mahsulotlarga nisbatan amal qiladi.
Ayniqsa, dori vositalarini tekshirishda ularning rasmiy ravishda tizimda qayd etilgan bo‘lishi talab qilinadi. Ya’ni har qanday dori emas, faqat qonuniy ravishda ro‘yxatdan o‘tgan mahsulotlar tekshiriladi.
Mazkur yangilik xaridorlarga qalbaki mahsulotlardan himoyalanish va to‘g‘ri tanlov qilish imkoniyatini beradi. Birgina skaner yordamida mahsulot haqidagi barcha muhim ma’lumotlarni olish mumkin.
Shu orqali Qozog‘istonda iste’molchilar huquqlarini himoya qilish bo‘yicha yana bir muhim qadam qo‘yildi.
