Karachida gaz portlashi: 16 kishi halok bo‘ldi
Pokistonning yirik shahri Karachida uch qavatli turarjoy binosida gaz portlashi sodir bo‘lib, og‘ir fojiaga sabab bo‘ldi. Bu haqda Zamin.uz xabar berdi.
Hodisa natijasida kamida 16 kishi halok bo‘ldi. Bu haqda mahalliy manbalar xabar berdi.
Ma’lum qilinishicha, portlash 19-fevral kuni ertalab soat 04:15 atrofida binoning birinchi qavatida yuz bergan. Jabrlanganlar va halok bo‘lganlar shahar fuqarolik shifoxonasiga olib borilgan.
Politsiya vakillarining bildirishicha, portlashga binodagi gaz tizimidagi nosozlik sabab bo‘lgan. Dastlabki ma’lumotlarga ko‘ra, halok bo‘lganlar orasida ayollar va bolalar ham bor.
Yana 14 nafar fuqaro turli darajada jarohat olgan bo‘lib, ulardan ayrimlarining ahvoli og‘ir deb baholanmoqda. Xavfsizlik xizmatlari portlash sabablarini aniqlash uchun gaz tizimidagi barcha muammolarni o‘rganmoqda.
Portlash natijasida yaqin atrofdagi binolar va transport vositalariga ham zarar yetgan. Sind viloyati bosh vaziri Murod Ali Shoh hodisa munosabati bilan chuqur qayg‘u izhor qildi va fojiaga sabab bo‘lgan omillarni o‘rganish uchun keng qamrovli tergov o‘tkazishni buyurdi.
Pokiston Prezidenti Asif Ali Zardori esa halok bo‘lganlarning oilalariga ta’ziya bildirib, kelgusida bunday hodisalarning oldini olish uchun xavfsizlik nazoratini kuchaytirish zarurligini ta’kidladi.
