Vashingtonda “Tinchlik kengashi”ning ilk yig‘ilishi o‘tkazildi

Bugun, 19-fevral kuni Vashington shahrida “Tinchlik kengashi”ning ilk yig‘ilishi bo‘lib o‘tdi. Bu haqda Zamin.uz xabar berdi.

Tadbir Oq uyning rasmiy platformalari orqali jonli efirda yoritildi. Yig‘ilish United States Institute of Peace binosida tashkil etilgan.

Sammitda mezbon davlat rahbari Donald Tramp ishtirokchilarni navbatma-navbat tanishtirdi. O‘zbekiston Prezidenti Shavkat Mirziyoyevga navbat kelganda, zalda iliq muhit yuzaga keldi.

Tramp Mirziyoyevning familiyasini talaffuz qilishda biroz qiynalganini tan oldi va buni hazil tariqasida izohladi. U O‘zbekiston Prezidentini o‘z do‘sti deb atab, uning familiyasini “tarixdagi eng murakkab familiyalardan biri” sifatida ta’rifladi.

Tramp o‘z so‘zida shunday dedi: “O‘zbekiston Prezidenti Mirziyoyev. U qayerda?

U shu yerda. U mening do‘stim.

U tarixdagi eng murakkab familiyalardan biriga ega, lekin bu ahamiyatli emas. Muhimi – bizning do‘stligimiz.” Mazkur sammit xalqaro hamkorlikni mustahkamlash, mintaqada barqarorlik va tinchlikni ta’minlashga qaratilgan muhim tadbir sifatida baholandi.