Islomobodda Bobur nomidagi yangi bog‘ barpo etiladi
Pokiston poytaxti Islomobod shahrida buyuk o‘zbek davlat arbobi va shoir Zahiriddin Muhammad Bobur nomi bilan ataladigan yangi bog‘ barpo etilishi rejalashtirilmoqda. Bu haqda Zamin.uz xabar berdi.
Ushbu bog‘ O‘zbekiston tomonidan Pokiston xalqiga do‘stlik va hamkorlik ramzi sifatida sovg‘a qilinadi. Bu haqda «Dunyo» axborot agentligi ma’lum qildi.
Loyiha doirasida bog‘ Islomobod shahrida 2,5 gektar maydonni qamrab olib, zamonaviy landshaft dizayni va qulay dam olish maskanlari bilan jihozlanadi. Shuningdek, bog‘da sayr yo‘laklari va boshqa infratuzilmalar ham tashkil etilishi ko‘zda tutilgan.
O‘zbekiston Respublikasi qurilish vaziri Sherzod Hidoyatov mazkur loyihaning amalga oshirilishiga rahbarlik qiladi. Ushbu tashabbus ikki davlat o‘rtasidagi madaniy aloqalarni yanada mustahkamlash, tarixiy merosga hurmatni oshirish va xalqlar o‘rtasidagi do‘stlik rishtalarini yanada chuqurlashtirishga xizmat qiladi.
Yangi bog‘ Pokiston aholisi va mehmonlari uchun madaniy-ma’rifiy dam olish maskani sifatida xizmat qilishi kutilmoqda. Bu loyiha ikki mamlakat o‘rtasidagi o‘zaro hamkorlikka yangi qadam bo‘lib xizmat qiladi.
