Mo‘g‘ulistonda qattiq qish 26 ming chorvani nobud qildi
Mo‘g‘ulistonda qattiq qish oqibatida 26 mingdan ortiq chorva mollari nobud bo‘ldi. Bu haqda Zamin.uz xabar berdi.
Bu holat mamlakatda "dzud" deb ataladigan tabiiy hodisa sabab yuzaga kelgan. "Dzud" - bu mo‘g‘ulcha atama bo‘lib, yerning muzlashi yoki qalin qor qoplami tufayli chorva mollari ochlik va sovuqdan nobud bo‘lishi holatini bildiradi.
12 fevral kuni Mo‘g‘uliston Milliy statistika boshqarmasi tomonidan taqdim etilgan ma’lumotlarga ko‘ra, yanvar oyida g‘arbiy viloyatlar va Markaziy Ovrxangay viloyatida 26 ming 300 dan ortiq chorva mollari halok bo‘lgan. Mamlakatdagi 21 viloyatdan kamida 11 tasi ushbu hodisadan jiddiy zarar ko‘rgan.
Ma’lumki, chorvachilik Mo‘g‘uliston iqtisodiyotining asosiy sohalaridan biri bo‘lib, ko‘chmanchi aholining taxminan 40 foizi shu soha bilan shug‘ullanadi. Ammo qattiq va uzoq davom etgan qish har yili chorvadorlar uchun katta yo‘qotishlarga sabab bo‘lmoqda.
Milliy statistika boshqarmasining hisobotiga ko‘ra, 2025 yil oxiriga kelib, Mo‘g‘ulistonda 58,1 million bosh chorva mavjud bo‘lishi kutilmoqda.
