Vashingtonda G‘azo uchun global yordam tashabbuslari muhokama qilindi
19-fevral kuni AQSh poytaxti Vashington shahrida AQSh Prezidenti Donald Tramp tashabbusi bilan Tinchlik kengashining birinchi yig‘ilishi bo‘lib o‘tdi. Bu haqda Zamin.uz xabar berdi.
Unda dunyoning turli davlatlari va xalqaro tashkilotlar G‘azo hududida barqarorlikni tiklash, aholining turmush sharoitini yaxshilash va xavfsizlikni ta’minlash bo‘yicha o‘z taklif va yordam rejalarini taqdim etdi. Yig‘ilishda ishtirokchilar quyidagi tashabbuslarni taklif qildi: O‘zbekiston: G‘azoda turar joy binolari, bolalar bog‘chalari, maktablar va tibbiyot muassasalarini qurishda ishtirok etishga tayyorligini bildirdi.
Bu orqali aholi turmushini yaxshilashga hissa qo‘shish rejalashtirilmoqda. AQSh: Chegara hududlarida xavfsizlik va tinchlikni ta’minlash uchun 10 milliard dollar moliyaviy yordam ajratishini ma’lum qildi.
Birlashgan Arab Amirliklari: Tinchlik kengashi loyihalari uchun 1,2 milliard dollar ajratishini e’lon qildi. Qatar: Kengash faoliyatini qo‘llab-quvvatlash uchun 1 milliard dollar ajratishga tayyorligini bildirdi.
Saudiya Arabistoni: Tinchlikni saqlash dasturlariga 1 milliard dollar miqdorida mablag‘ ajratishini ma’lum qildi. Indoneziya: G‘azoda xalqaro xavfsizlik kuchlari tarkibiga 8 mingdan ortiq harbiy xizmatchi yuborishga tayyorligini e’lon qildi.
Qozog‘iston: Tinchlik kengashiga moliyaviy hissa qo‘shish va oziq-ovqat yordami sifatida bug‘doy yetkazib berishga tayyorligini ma’lum qildi. Bahrayn: G‘azo uchun davlat raqamli xizmatlari platformasini yaratish uchun texnik infratuzilma va mutaxassislarni taqdim etishga tayyorligini bildirdi.
Misr: Falastinlik politsiya xodimlarini tayyorlash bo‘yicha amaliy ishlarni davom ettirishini ma’lum qildi. Ruminiya: Favqulodda xizmatlar, ta’lim muassasalari va huquq-tartibot tizimini tiklashda yordam ko‘rsatishga tayyorligini bildirdi.
Turkiya: Sog‘liqni saqlash va ta’lim sohalarini tiklash, politsiya va harbiy xizmatchilarni tayyorlashga yordam berishni rejalashtirayotganini e’lon qildi. Marokash: Politsiya xodimlarini yuborish, harbiy dala shifoxonasi tashkil etish va boshqa amaliy yordam ko‘rsatishga tayyorligini bildirdi.
Ushbu tashabbuslar G‘azodagi ijtimoiy infratuzilmani tiklash, xavfsizlikni mustahkamlash va aholining hayot sifatini yaxshilashga qaratilgan global sa’y-harakatlarning bir qismidir.
