Amsterdamda KLM samolyotlari o‘rtasida to‘qnashuv yuz berdi
Amsterdam shahridagi Sxipxol aeroportida KLM aviakompaniyasiga tegishli ikki samolyot o‘rtasida to‘qnashuv sodir bo‘ldi. Bu haqda Zamin.uz xabar berdi.
Bu haqda ANP axborot agentligi xabar berdi. Ma’lum bo‘lishicha, voqea vaqtida samolyotlardan biri harakatsiz holatda turgan.
Ikkinchi samolyot esa evakuator yordamida ko‘chirilayotgan paytda birinchi samolyotga urilgan. Hodisa sabablari va tafsilotlari hozirda o‘rganilmoqda.
Mutaxassislar tomonidan har ikki samolyot texnik ko‘rikdan o‘tkazilmoqda. KLM aviakompaniyasi vakili hodisa yuzasidan tegishli idoralar bilan hamkorlik olib borilayotganini ma’lum qildi.
Unga ko‘ra, samolyotlar xizmatga qaytarilishidan oldin sinchiklab tekshiriladi. Xabarlarga ko‘ra, to‘qnashuvdan avval reyslardan biri Afina shahriga uchishi rejalashtirilgan edi, ikkinchi samolyot esa Birmingemdan kelib qo‘ngan.
Hodisadan keyin har ikki samolyotdagi yo‘lovchilar va ekipaj a’zolari darvozalarga qaytarilgan. KLM aviakompaniyasi barcha yo‘lovchilarni muqobil reyslarga qayta bron qilganini tasdiqladi.
Hozirda voqea yuzasidan batafsil tekshiruv ishlari davom etmoqda.
