Pokistonning havo hujumlari: 17 kishi halok bo‘ldi
21-fevral kuni kechasi Pokiston harbiy aviatsiyasi Afg‘onistonning sharqiy hududlarida havo hujumlarini amalga oshirdi. Bu haqda Zamin.uz xabar berdi.
Bu harakat jangarilarga qarshi yo‘naltirilgan bo‘lib, Pokiston tomoni uni razvedka ma’lumotlariga asoslangan holda aniq nishonlarga qaratilgan deb izohlagan. Shu bilan birga, Kobul rasmiylari mazkur hujumlarga keskin e’tiroz bildirdi.
Pokiston rasmiy bayonotida havo zarbalari Tehriki Tolibon Pakistan (TTP) va unga aloqador guruhlarni nishonga olgani aytilgan. Hukumat ushbu guruhlarni mamlakatda so‘nggi vaqtlarda sodir etilgan xavfli hujumlar uchun javobgar deb hisoblamoqda.
Islomoboddagi axborot idoralari bu amaliyotlarni Pokiston xavfsizligini ta’minlash choralari sifatida baholab, xalqaro hamjamiyatni Afg‘onistonga bosim o‘tkazishga chaqirdi. Afg‘oniston tomoni esa hujum oqibatida tinch aholi, jumladan ayollar va bolalar halok bo‘lganini ma’lum qildi.
Dastlabki ma’lumotlarga ko‘ra, kamida 17 kishi vafot etgan. Xususan, Bihsud tumanidagi zarbalar natijasida bir nechta oila a’zolari, jumladan 12 nafar bola va o‘smir halok bo‘lgan.
Ko‘plab insonlar jarohat olgani, turar-joylar vayron bo‘lgani haqidagi foto va videolar ijtimoiy tarmoqlarda tarqalmoqda. Afg‘oniston Mudofaa vazirligi mazkur hujumlarni qoralab, Pokistonga munosib javob qaytarilishi mumkinligini bildirdi.
Rasmiylar bu voqeani xalqaro huquq normalarining buzilishi sifatida baholab, xalqaro hamjamiyatni bu holatga e’tibor qaratishga chaqirdi.
