Sakkiz kun uxlamagan erkak ruhiy buzilishga uchradi
London shahrida yashovchi 32 yoshli Tommi Greyvs sakkiz kun davomida uxlamasdan ishlagani oqibatida og‘ir ruhiy buzilish holatiga tushib, ruhiy kasalliklar shifoxonasiga yotqizilgan. Bu haqda Zamin.uz xabar berdi.
Ushbu voqea ikki yil avval sodir bo‘lgan. Tommi boshpanasiz odamlarga yordam beruvchi xayriya tashkiloti uchun mablag‘ yig‘ish loyihasida faol ishlagan.
U ishga haddan tashqari berilib ketib, dam olishni butunlay unutgan. Greyvsning so‘zlariga ko‘ra, ishlash davomida uning miya faoliyati haddan tashqari zo‘riqib, tinimsiz yangi g‘oyalar bilan band bo‘lgan.
Bu holat uning uyquga ketishiga to‘sqinlik qilgan. Ishdagi stress kuchaygan sari, u o‘zini nazorat qila olmay qolgan.
Oxir-oqibat, Greyvsning oilasi uning sog‘lig‘idan xavotirlanib, uni shifoxonaga olib borishga majbur bo‘lgan. O‘sha paytda Tommi ruhiy holatini to‘liq yo‘qotib, atrofdagi voqea-hodisalardan bexabar bo‘lgan.
U hatto o‘zini telestudiyada turgandek his qilib, "Oskar" mukofotini olishni orzu qilgan holda xodimlar oldida qo‘shiq kuylab, raqsga tushgan. Greyvs shifoxonada bir oy davomida davolanib, sog‘ayganidan so‘ng uyiga qaytarilgan.
Keyingi ikki yil davomida u mutaxassislar yordamida to‘g‘ri uyqu rejimini o‘rganib, hayotini tartibga solgan. Hozirda u kundalik rejimga qat’iy amal qilib, ayniqsa, uyqu vaqtiga jiddiy e’tibor qaratmoqda.
