Yolg‘iz qolgan Panchga mehr ko‘rsatildi
Ijtimoiy tarmoqlarda inson qalbini bir vaqtning o‘zida ezib, umid ham uyg‘otadigan bir video keng tarqalmoqda. Bu haqda Zamin.uz xabar berdi.
Ushbu videoda kichkina makaka – Panch ismli maymunning hayoti tasvirlangan. Panchning tug‘ilganidan so‘ng onasi uni tashlab ketgan.
Bu voqea Yaponiyaning Itikava shahridagi hayvonot bog‘ida yuz bergan. Dastlab hayvonot bog‘i xodimlari Panchni o‘zlari parvarish qilgan bo‘lsa, keyinchalik uni boshqa maymunlar yashaydigan volerga qo‘shganlar.
Biroq bu yerdagi to‘da Panchni darrov qabul qilmagan. Bu kichik makaka uchun og‘ir sinov bo‘ldi: yangi muhit, yangi qoidalar va begonalik hissi.
Xodimlar Panchga IKEA kompaniyasi tomonidan ishlab chiqarilgan orangutan shaklidagi yumshoq o‘yinchoqni sovg‘a qilishdi. O‘shandan buyon Panch bu o‘yinchoqni o‘zidan ajratmaydi, u bilan birga yuradi va uni bag‘riga bosadi.
Videoning bir qismida katta yoshli bir maymun Panchga tajovuz qilgani, uni sudragani va hujum qilgani aks etgan. Panch esa o‘yinchog‘i tomon yugurib, uni bag‘riga bosadi.
Ammo keyingi kadrlarda katta yoshli boshqa bir maymun Panchni himoya qilib, uni bag‘riga bosgani va unga mehr ko‘rsatgani ko‘rsatilgan. Shuningdek, tengdosh maymunlardan biri Panch bilan o‘ynab, unga yaqinlashgani tasvirlangan.
Hayvonot bog‘i xodimlari makakalar orasida vaqt-vaqti bilan tajovuzlar kuzatilishini, bu tur uchun odatiy holat ekanligini aytishdi. Unga ko‘ra, Panchni boshqa volerga ko‘chirish to‘g‘ri qaror emas, chunki makakalar yolg‘iz yashay olmaydi.
U to‘daga asta-sekin qo‘shilishi kerak. Videoning keng tarqalishi ortidan ko‘plab odamlar Panchni ko‘rish uchun hayvonot bog‘iga tashrif buyurmoqda.
Ijtimoiy tarmoqlarda esa “Bardam bo‘l, Panch” degan heshteg ostida minglab izohlar yozilgan. IKEA kompaniyasining Yaponiyadagi bo‘limi prezidenti Petra Fare ham hayvonot bog‘iga kelib, Panchga yumshoq o‘yinchoqlar sovg‘a qilgani ma’lum bo‘ldi.
Panchning hayoti birdaniga o‘zgarib ketadi deyish qiyin, lekin bir narsa aniq: u yolg‘iz emas. Unga yordam berayotgan insonlar bor, to‘dada ham unga mehr ko‘rsatayotganlar topilmoqda.
Eng muhimi, Panch sekin-asta ishonishni o‘rganmoqda.
