Meksikada “El Mencho” yo‘q qilindi, tartibsizliklar kuchaydi

Meksikada mamlakatning eng xavfli jinoyatchilaridan biri, Nemesio Osegera Servantes — “El Mencho” yo‘q qilingani haqida xabarlar tarqaldi. Bu haqda Zamin.uz xabar berdi.

Ushbu voqea butun Meksikada katta shov-shuvga sabab bo‘ldi. Ma’lum qilinishicha, maxsus harbiy operatsiya Xalisko shtatida o‘tkazilgan va “El Mencho” otishma vaqtida halok bo‘lgan.

Operatsiya Tapalpa hududida, Gvadalaxara shahridan janubroqda amalga oshirilgan. Hukumat va yirik nashrlarning ma’lumotiga ko‘ra, bu hudud uzoq yillardan beri narkokartel ta’siri ostida bo‘lgan.

“El Mencho”ning yo‘q qilinishi xalqaro e’tibor qozondi, chunki AQSH unga 15 million dollar mukofot va’da qilgan edi. Shu sababli voqea nafaqat Meksika ichida, balki xalqaro miqyosda ham muhim hodisa sifatida baholanmoqda.

Biroq, bu operatsiyadan so‘ng Xalisko yangi avlod kartelining agressiv javob harakatlari kuzatilmoqda. Turli hududlarda yo‘llar to‘silgan, avtomobillar va yuk mashinalari yoqilgan, qurolli to‘qnashuvlar ko‘paygan.

Gvadalaxara va Puerto-Valyarta shaharlarida xavfsizlik choralari kuchaytirilib, ba’zi yo‘nalishlarda harakat cheklangan, parvozlar ham uzilgan. Shtat gubernatori Pablo Lemus Navarro kartelning kuch tuzilmalariga qarshi harakat qilganini tasdiqladi.

Mutaxassislarning fikricha, kartel ichida yangi yetakchi uchun kurash boshlanishi mumkin. Bu esa zo‘ravonliklarning davom etishiga olib kelishi ehtimoli bor.

The New York Times nashri “El Mencho”ni Meksikadagi eng shafqatsiz jinoyatchilardan biri sifatida ta’riflab, CJNG kartelining narkotik savdosidagi rolini alohida ta’kidlagan.