Dengiz cho‘chqasi Kora sakrash bo‘yicha rekord o‘rnatdi
San-Fransisko shahrida yashovchi Kora ismli dengiz cho‘chqasi o‘zining qobiliyati bilan Ginnesning rekordlar kitobiga kirdi. Bu haqda Zamin.uz xabar berdi.
U bardan sakrash bo‘yicha rekord o‘rnatdi. Bu qiziqarli voqea 13 yoshli Zoi Xirnning tashabbusi bilan boshlangan.
Zoi kemiruvchilar ham sakray oladimi, deb qiziqib, Korani balandlikka sakrashga o‘rgata boshladi. Zoining ota-onasi bu jarayon uchun maxsus yog‘och to‘siq tayyorlab, xavfsizlik choralarini ko‘rishdi.
Mashg‘ulotlar davomida Zoi Koraga ko‘k mevalar va salat barglari kabi rag‘batlantiruvchi taomlar ko‘rsatib, uni turli balandlikdagi to‘siqlardan sakrashga o‘rgatdi. Natijada, Kora 26,6 santimetr balandlikdagi bardan muvaffaqiyatli sakrab, o‘zining noyob qobiliyatini namoyish etdi.
Ginnesning rekordlar kitobi vakillari Koraning bu mahoratini tan oldi va uni rasmiy rekord sifatida qayd etdi. Zoining so‘zlariga ko‘ra, Kora nafaqat sakrashni, balki skripka chalishni tinglashni ham yaxshi ko‘radi.
Shuningdek, u boshqa dengiz cho‘chqalari Koko va Xloya bilan vaqt o‘tkazishni yoqtiradi.
