Afg‘onistonda erkak shifokorlarga diniy ruxsat berildi
Afg‘onistonda erkak shifokorlarga ayol bemorlarni ko‘rikdan o‘tkazish bo‘yicha diniy ruxsat berilgani haqida bayonot e’lon qilindi. Bu haqda Zamin.uz xabar berdi.
Afg‘oniston Aloqa vaziri Hamdulla Nomaniyning so‘zlariga ko‘ra, shifokorlarga tibbiy zarurat sababli ayol bemorlarning odatda ochilishi taqiqlangan tana qismlarini ko‘rishga diniy huquq berilgan. Vazir o‘z nutqida ayrim holatlarda hatto ayolning yuziga qarash ham cheklanganini ta’kidladi.
Ammo tibbiy yordam jarayonida bunday cheklovlar amal qilmasligi alohida qayd etilgan. Nomaniy shunday dedi: “Men, vazir sifatida, ayol kishining yuziga qarashga haqqim yo‘q.
Biroq siz, shifokorlar, tibbiy ehtiyoj sababli bunday huquqqa egasiz. Ayol bemor operatsiya stolida yotganida uning barcha tana qismlari sizning ko‘zingiz oldida bo‘lishi mumkin, hatto kiyimlarini yechishingizga ham ruxsat beriladi.” Shu bilan birga, vazir shifokorlarni ushbu huquqdan faqat tibbiy ehtiyoj va kasbiy mas’uliyat doirasida foydalanishga chaqirdi.
U bu ruxsat noto‘g‘ri talqin qilinmasligi va suiiste’mol qilinmasligi lozimligini alohida ta’kidladi.
