O‘zbekiston va Rossiyada qo‘ng‘izlarning 7 yangi turi aniqlandi
O‘zbekiston va Rossiya olimlari hamkorlikda qo‘ng‘izlarning 7 ta yangi turini aniqladi. Bu haqda Zamin.uz xabar berdi.
Ushbu ilmiy izlanishlarda Xorazm Ma’mun akademiyasi va bir nechta ilmiy-tadqiqot institutlari faol ishtirok etgan. Yangi aniqlangan qo‘ng‘iz turlari Dailognatha urug‘iga mansub bo‘lib, ular bo‘yicha maxsus tadqiqotlar o‘tkazilgan.
Ushbu hasharotlar, asosan, toshloq va adir hududlarda uchraydi. Mutaxassislarning ta’kidlashicha, bu qo‘ng‘izlar tabiat uchun foydalidir.
Ular organik qoldiqlarni parchalash orqali tuproq unumdorligini oshirishga yordam beradi. Shu bilan birga, ularning faoliyati ekologik muvozanatni saqlashda muhim ahamiyatga ega.
Mazkur kashfiyot natijasida dunyo bo‘yicha Dailognatha urug‘iga mansub qo‘ng‘izlar soni 21 tadan 28 tagacha oshgani qayd etildi. Bu esa ushbu turdagi hasharotlarning biologik xilma-xilligini yanada boyitdi.
