Kim Chen In qizi harbiy rahbarlikda faol ishtiroqda
Shimoliy Koreyada mamlakat rahbari Kim Chen Inning qizi davlat va harbiy tizimlarda faol ishtirok etmoqda. Bu haqda Zamin.uz xabar berdi.
Xorijiy axborot vositalarining xabar berishicha, 13 yoshli Kim Ju E raketa dasturi bilan bog‘liq bo‘lgan masalalarda rahbarlik qilmoqda. Newsweek nashrining ma’lumotiga ko‘ra, Kim Chen In qiziga raketalar ishlab chiqarish bilan shug‘ullanuvchi boshqarmada mas’ul lavozimni topshirgan.
Ushbu qaror, tahlilchilarning fikricha, Kim Ju Ening siyosiy va harbiy maydondagi rolini mustahkamlash hamda uni davlat boshqaruviga asta-sekin jalb qilish strategiyasining bir qismi sifatida ko‘rilmoqda. Kelajakda bu jarayon uning Koreya xalq armiyasidagi ta’sirini oshirishga qaratilgan bo‘lishi mumkin.
Ayrim razvedka ma’lumotlariga ko‘ra, harbiy hisobotlar bevosita Kim Ju Ega taqdim etilayotgani qayd etilgan. Bu kabi holatlar Shimoliy Koreyada kelajakdagi yetakchini tayyorlash jarayonining boshlanishi sifatida talqin qilinadi.
Shuningdek, Janubiy Koreya manbalari Kim Chen In hokimiyatni qiziga topshirish ehtimolini ham ilgari surgan edi. Bu ma’lumotlar KXDRda siyosiy vorislik masalasi dolzarb mavzulardan biri ekanini ko‘rsatmoqda.
