Moskva vokzalidagi portlash ikki kishini hayotdan olib ketdi

Bugun, 24-fevralga o‘tar kechasi Moskva shahridagi Savelovsk vokzal maydonida portlash sodir bo‘ldi. Bu haqda Zamin.uz xabar berdi.

Ushbu hodisa natijasida ikki kishi halok bo‘lgan, yana ikki kishi turli darajada tan jarohatlari olib, shifoxonaga yotqizilgan. Bu haqda “Astra” nashri xabar berdi.

Ma’lumotlarga ko‘ra, voqea taxminan soat 00:05 da yuz bergan. Portlashni sodir etgan shaxs yo‘l-patrul xizmati xodimlari oldiga kelganida noma’lum jism portlab ketgan.

Oqibatda 34 yoshli katta inspektor, leytenant D.B halok bo‘lgan. Yana ikki xodim jarohat olib, shifoxonaga joylashtirilgan.

Portlash xizmat avtomobiliga ham zarar yetkazgan, oynalari sinib, salon va boshqa qismlari shikastlangan. Dastlab gumonlanuvchi voqea joyidan qochib ketgani aytilgan edi.

Biroq kuzatuv kameralari yozuvlari va tergov natijalari portlashni sodir etgan shaxsning o‘zi ham halok bo‘lganini ko‘rsatdi. Mazkur hodisa yuzasidan Rossiya Jinoyat kodeksining huquqni muhofaza qiluvchi organ xodimining hayotiga tajovuz qilish (317-modda) va portlovchi qurilmalarni noqonuniy ishlatish (222.1-modda) bo‘yicha jinoyat ishi qo‘zg‘atilgan.

Tergov davom etmoqda.