AQShda kuchli qor bo‘roni: 2 ming reys bekor qilindi
AQShning shimoli-sharqiy hududlariga kuchli qor bo‘roni yopirilishi oqibatida mamlakat bo‘ylab 2 mingdan ortiq aviareys bekor qilindi, yana kamida 700 ta parvoz kechiktirildi. Bu haqda Zamin.uz xabar berdi.
Bu haqda parvozlarni kuzatish bo‘yicha FlightAware onlayn xizmati ma’lum qildi. Xabarga ko‘ra, bir kun davomida AQSh ichida, shuningdek, mamlakatga kelishi yoki undan chiqishi rejalashtirilgan jami 2 026 ta reys bekor qilingan.
Bu holat mamlakat transport tizimida jiddiy uzilishlarga olib kelmoqda. Mamlakat ichki xavfsizlik vaziri Kristi Noemning ma’lum qilishicha, shimoli-sharqiy shtatlar tomon yana bir tabiiy ofat yaqinlashmoqda.
Uning so‘zlariga ko‘ra, Nyu-Jersi shtatidan tortib, Janubi-Sharqiy Yangi Angliya hududlarigacha bo‘lgan masofada kuchli qor yog‘ishi, shamol va bo‘ronlar kuzatilishi mumkin. Ayni paytda sohilbo‘yi hududlari eng katta zarar ko‘rishi kutilmoqda.
Shuningdek, joriy yilning yanvar oyida ham mamlakatning katta qismi kuchli qor yog‘ishi ta’sirida qolgan edi. Ayniqsa, qish sharoitiga nisbatan kam moslashgan Tennessi, Missisipi va Luiziana shtatlarida og‘ir oqibatlar qayd etilgan.
Bu vaziyat mahalliy hukumatlar va favqulodda xizmatlar uchun jiddiy sinov bo‘lmoqda.
