Buyuk Britaniyada donor bachadoni bilan ilk chaqaloq tug‘ildi

Buyuk Britaniyada ilk bor vafot etgan donordan ko‘chirib o‘tkazilgan bachadon yordamida chaqaloq dunyoga keldi. Bu haqda Zamin.uz xabar berdi.

BBC xabariga ko‘ra, bolaning onasi 30 yoshlar atrofidagi Greys Bell bo‘lib, u tug‘ma bachadonsiz dunyoga kelgan. Bell MRKH sindromiga ega bo‘lib, bu holat Buyuk Britaniyada taxminan 5 ming ayolda uchraydi.

Ushbu sindrom bilan tug‘ilgan ayollar hayz ko‘rmaydi, lekin tuxumdonlari normal faoliyat ko‘rsatadi. Bell 16 yoshida farzand ko‘ra olmasligini bilgan.

Er-xotin uchun yagona imkoniyat bachadon transplantatsiyasi yoki surrogat onalik bo‘lgan. 2024 yil iyun oyida Oksforddagi Cherchill kasalxonasida Bellga donor bachadoni ko‘chirib o‘tkazildi.

Ushbu operatsiya 10 soat davom etdi. Operatsiyadan keyin ular Londondagi Lister fertil klinikasida EKU muolajasidan o‘tgan.

Natijada, 2025 yil dekabr oyida Bell Londondagi Qirolicha Sharlotta kasalxonasida Hugo ismli o‘g‘il farzandni dunyoga keltirdi. Chaqaloqning vazni qariyb 3,2 kilogrammni tashkil etdi.

Hozirda u 10 haftalik. Bell ushbu jarayonni hayotidagi katta mo‘jiza deb atadi.

U donor va uning oilasini minnatdorlik bilan esga olib, ular unga hayotning eng katta sovg‘asini hadya etganini ta’kidladi. Bu yangilik bachadonsiz ayollar uchun katta umid uyg‘otdi.

Bellga qilingan transplantatsiya Buyuk Britaniyada klinik tadqiqotlar doirasida amalga oshirilayotgan 10 ta shunday operatsiyadan biridir. Hozirga qadar uchta transplantatsiya o‘tkazilgan bo‘lib, chaqaloq tug‘ilishi birinchi marta kuzatilmoqda.

2025 yil boshida esa tirik donor bachadoni yordamida dunyoga kelgan ilk chaqaloq Emi tug‘ilgan. Onasiga bachadon 2023 yil yanvarda opasidan ko‘chirib o‘tkazilgan edi.

Yaqin qarindoshlardan yana beshta bachadon transplantatsiyasi rejalashtirilgan.