Qozog‘istonda harbiy qiruvchi samolyot halokatga uchradi
Bugun, 25-fevral kuni Qozog‘istonning Qarag‘anda viloyatida Su-30SM rusumli harbiy qiruvchi samolyot avariyaga uchradi. Bu haqda Zamin.uz xabar berdi.
Bu haqda mamlakat Mudofaa vazirligi rasmiy axborot berdi. Vazirlik ma’lumotiga ko‘ra, hodisa rejali o‘quv-mashg‘ulot parvozi davomida sodir bo‘lgan.
Hozircha halokatning aniq sabablari oshkor qilinmagan. Samolyot ekipaji voqea yuz bergan paytda katapultadan muvaffaqiyatli foydalanib, o‘z jonini saqlab qolgan.
Uchuvchilar tirik, ularning hayoti va sog‘lig‘iga jiddiy xavf yo‘qligi aytilmoqda. Hozirda ular tibbiyot mutaxassislari nazorati ostida bo‘lib, zarur yordam ko‘rsatilmoqda.
Hodisa sodir bo‘lgan hudud xavfsizlik maqsadida o‘ralgan. Rasmiylarga ko‘ra, bu hududda na aholi, na infratuzilma obyektlariga xavf mavjud.
Voqea sabablarini aniqlash uchun maxsus komissiya tuzilib, tergov ishlari boshlangan. Tergov natijalariga ko‘ra, huquqiy baho berilib, tegishli qarorlar qabul qilinishi rejalashtirilgan.
Hodisa yuzasidan qo‘shimcha ma’lumotlar tergov yakunlariga ko‘ra e’lon qilinishi kutilmoqda.
