Trampning Kongressdagi nutqi siyosiy bahslarni kuchaytirdi

AQSh prezidenti Donald Tramp 2026-yil 24-fevral kuni Kongressda ikki soatga yaqin davom etgan nutqi bilan Amerika siyosatida yana qizg‘in bahslarni keltirib chiqardi. Bu haqda Zamin.uz xabar berdi.

Reuters agentligi uning bu chiqishini ikkinchi prezidentlik muddati davomida eng muhim siyosiy nutqlardan biri sifatida ta'riflab, unda iqtisodiyot, migratsiya va tashqi siyosat masalalari asosiy mavzu bo‘lgani qayd etildi. Tramp o‘z nutqida Qo‘shma Shtatlar uning rahbarligi ostida “oltin davr”ga qadam qo‘yayotganini ta’kidladi.

U mamlakat misli ko‘rilmagan darajada boyib, qudratli tus olayotganini aytib o‘tdi. Oq uy ham nutqdan keyingi rasmiy bayonotida iqtisodiy ko‘rsatkichlar yaxshilanayotgani, inflyatsiya pasayayotgani va Amerika yana kuch-qudratga ega bo‘layotganini ta'kidladi.

Biroq Trampning barcha bayonotlari birdek qabul qilinmadi. Masalan, u prezidentlik davrining boshida sakkizta xalqaro mojaro va urushni to‘xtatganini aytdi.

Reuters bu da'volarni “bo‘rttirilgan” deb baholab, bu borada jiddiy shubhalar mavjudligini qayd etdi. Iqtisodiyot masalasida ham Tramp o‘zini inflyatsiyani pasaytirgan rahbar sifatida ko‘rsatishga urindi.

Ammo Reutersning tahlillariga ko‘ra, narxlar hali ham saylovchilar uchun dolzarb muammo bo‘lib qolmoqda. Inflyatsiya darajasi taxminan 3 foiz atrofida saqlanayotgan bo‘lsa-da, bu boradagi yutuqlarni keskin burilish sifatida baholash qiyin.

Migratsiya mavzusida Tramp o‘zining an’anaviy tanqidiy pozitsiyasini saqlab qoldi. U demokratlarni chegara xavfsizligini ta’minlashda muvaffaqiyatsizlikda aybladi va mamlakatga xavfli oqim kirayotganini ta'kidladi.

Reuters bu mavzuni nutqning eng tortishuvli qismi sifatida baholadi. Umuman olganda, Trampning Kongressdagi nutqi uning hali ham Amerika siyosatidagi eng bahsli shaxslar qatorida ekanini ko‘rsatdi.

Bir tomonda uning bayonotlarini qo‘llab-quvvatlovchilar bo‘lsa, ikkinchi tomonda esa bu iddaolarni shubha ostiga olayotgan tahlilchilar mavjud. Shu bois, bu nutq oddiy siyosiy ma'ruza emas, balki AQShdagi navbatdagi katta bahslarning boshlanishi bo‘ldi.