14 yoshli falastinlik bola otib o‘ldirildi
G‘arbiy Sohildagi al-Fara qochqinlar lagerida 14 yoshli falastinlik o‘spirin Jad Jadalloh 2025 yilning noyabr oyida Isroil mudofaa kuchlari harbiylari tomonidan otib o‘ldirilgani haqida xabar berildi. Bu haqda Zamin.uz xabar berdi.
Guvohlarning so‘zlariga va mavjud videotasvirlarga ko‘ra, bola yerga yiqilganidan so‘ng kamida 45 daqiqa davomida qon yo‘qotib yotgan. Shu vaqt ichida uning atrofini 14 nafar askar o‘rab turgan, lekin hodisa joyiga yetib kelgan tez yordam mashinalariga bolaning yoniga yaqinlashishga ruxsat berilmagan.
Ushbu voqea haqida BBC xabar berdi. Harbiylar o‘spirin “tosh otgan” deb da’vo qilib, o‘q otish qoidalarga mos bo‘lganini ta’kidlagan.
Ammo videotasvirlarda askarlardan biri bolaning yoniga qandaydir buyum tashlab, so‘ngra uni suratga olayotgani aks etgan. Jadning onasi Safa va huquq himoyachilariga ko‘ra, bu harakat bolaning aybdor qilib ko‘rsatilishiga urinish bo‘lishi mumkin.
Kuzatuv kameralari tasvirlarida askar bolaning yoniga uch metr masofadan o‘q uzgani, Jad devor bo‘ylab qochganida yana o‘qqa tutilgani va bir necha metr yurib, yordam so‘rab yiqilgani ko‘rinadi. Falastin Qizil Yarim Oy jamiyati ma’lumotlariga ko‘ra, chaqiruvdan sakkiz daqiqa o‘tib yetib kelgan feldsherlarga qurollangan harbiylar bolaning yoniga yaqinlashishga 35 daqiqa davomida ruxsat bermagan.
Harbiylar buni xavfsizlik chorasi sifatida izohlab, portlovchi moslama yo‘qligiga ishonch hosil qilish kerakligini bildirgan. Hozirga qadar Jadning jasadi oilasiga topshirilmagan.
Ma’lum qilinishicha, Isroil tomonidan 700 dan ortiq falastinliklarning jasadi saqlanmoqda. Oila bu vaziyatni og‘riqli va javobsiz savollarni ko‘paytiruvchi omil sifatida baholamoqda.
