Pokiston “Tolibon”ga qarshi keng ko‘lamli amaliyot boshladi
Pokiston Afg‘onistondagi “Tolibon” harakatiga qarshi keng ko‘lamli harbiy amaliyot boshladi. Bu haqda Zamin.uz xabar berdi.
BBC xabariga ko‘ra, Pokiston harbiylari Kobul va Qandahor shaharlarida tunda avia zarbalar uyushtirgan. Ushbu hujumlar 27-fevral kuni kechasi amalga oshirilgani ma’lum qilindi.
Pokiston bosh vaziri matbuot kotibi Mosharraf Zaydiy bergan ma’lumotlarga ko‘ra, operatsiya davomida “Tolibon”ga qarashli 27 ta harbiy post yo‘q qilingan, to‘qqizta post esa egallab olingan. Shuningdek, 80 dan ortiq tank, artilleriya vositalari va qurollangan transportlar yo‘q qilinib, katta zarar yetkazilgani ta’kidlandi.
Zaydiyning qayd etishicha, ushbu amaliyot natijasida “Tolibon”ning 133 nafar a’zosi halok bo‘lgan, 200 dan ortiq jangari esa yaralangan. Uning so‘zlariga ko‘ra, Pokiston tomoni tajovuzlarga qarshi tezkor va samarali javob qaytarishda davom etmoqda.
Pokiston mudofaa vaziri Xavaja Osif esa “Tolibon” harakatiga qarshi “ochiq urush” e’lon qilganini ma’lum qildi. Vazirning so‘zlariga ko‘ra, Pokiston masalani diplomatik yo‘l bilan hal qilishga uringan, ammo vaziyat keskinlashib, munosabatlar ochiq urush bosqichiga o‘tgan.
