O‘zbekiston Pokiston va Afg‘onistonni tinchlikka chaqirdi

O‘zbekiston Tashqi ishlar vazirligi Pokiston va Afg‘oniston o‘rtasida yuzaga kelgan qurolli to‘qnashuvlarga munosabat bildirdi. Bu haqda Zamin.uz xabar berdi.

Rasmiy bayonotda chegara hududidagi vaziyatning keskinlashayotgani jiddiy xavotir uyg‘otayotgani ta’kidlangan. Bayonotda, O‘zbekiston tomonlarni zudlik bilan otishmani to‘xtatishga, vazminlik saqlashga va keskinlikni kuchaytiruvchi harakatlardan tiyilishga chaqirgan.

Shuningdek, barcha kelishmovchiliklarni faqat tinch yo‘l bilan, siyosiy va diplomatik muloqot orqali hal qilish zarurligi alohida qayd etilgan. Davlatlarning suvereniteti, hududiy yaxlitligi va o‘zaro hurmat tamoyillariga rioya qilish muhimligi ham ta’kidlangan.

Avvalroq Pokiston qo‘shinlari Afg‘onistonning Kobul va Qandahor shaharlaridagi harbiy obyektlarga havo zarbalari bergani xabar qilingan edi. Javoban, "Tolibon" harakati esa Pokiston harbiy inshootlariga zarba berganini ma’lum qilgan.

Har ikki tomon bu to‘qnashuvlar natijasida yo‘qotishlar haqida xabar tarqatmoqda. O‘zbekiston mintaqada tinchlik va barqarorlikni saqlashga chaqirib, qo‘shni davlatlarni o‘zaro muloqot va hamkorlikka undagan.