Xitoy fuqarolariga Eronga safar qilish tavsiya etilmadi

Xitoy Tashqi ishlar vazirligining Konsullik ishlari departamenti o‘z fuqarolariga Eronga safar qilishdan vaqtincha tiyilishni tavsiya qildi. Bu haqda Zamin.uz xabar berdi.

Ushbu qaror 27-fevral kuni "The Global Times" nashrida e’lon qilingan. Rasmiy bayonotda ta’kidlanishicha, Erondagi mavjud xavfsizlik vaziyati sababli Xitoy fuqarolariga bu mamlakatga safar qilishdan voz kechish tavsiya etiladi.

Shuningdek, hozirda Eron hududida bo‘lib turgan Xitoy fuqarolariga shaxsiy xavfsizlikni ta’minlash choralarini kuchaytirish hamda imkon qadar tezroq mamlakatni tark etish tavsiya qilingan. Bundan tashqari, Xitoyning Eron va unga qo‘shni davlatlardagi diplomatik vakolatxonalari fuqarolarga tijorat aviareyslari yoki quruqlik yo‘nalishlari orqali mamlakatdan chiqib ketishda amaliy yordam ko‘rsatishi mumkinligi ta’kidlangan.

Xavfsizlik choralari va fuqarolarning himoyasi masalasi Xitoy hukumati uchun ustuvor ahamiyatga ega ekani qayd etilgan.