AQSh razvedkasi Xominaiyning joylashuvini aniqladi

AQSh va Isroilning Eronga qarshi amalga oshirgan hujumi atrofida yangi tafsilotlar ma’lum bo‘lmoqda. Bu haqda Zamin.uz xabar berdi.

The New York Times nashri va Reuters manbalariga ko‘ra, AQSh Markaziy razvedka boshqarmasi Eron oliy rahbari Ali Xominaiyning qayerda ekaniga alohida e’tibor qaratgan. Xabar berilishicha, razvedka Xominaiyning joylashuvi haqida aniq ma’lumotga ega bo‘lgan.

AQSh razvedkasi bir necha oy davomida Xominaiyning harakatlanish tartibi va xavfsizlik yo‘nalishlari haqida ma’lumot to‘plagan. Manbalar ta’kidlashicha, 28-fevral kuni Tehronda hukumat va xavfsizlik idoralari joylashgan hududda yuqori rahbariyat yig‘ilishi bo‘lib o‘tishi kutilgan.

Bu yig‘ilishda Ali Xominaiyning ham ishtirok etishi taxmin qilingan. Ushbu ma’lumot AQSh va Isroil uchun katta imkoniyat sifatida baholangan.

Chunki bu orqali bir vaqtning o‘zida Eronning siyosiy-xavfsizlik elitasi va oliy rahbarga yaqin joylashuvga zarba berish imkoniyati yuzaga kelgan. Reuters xabariga ko‘ra, hujum oldindan rejalashtirilgan bo‘lishi mumkin, ammo yangilangan razvedka ma’lumotlari operatsiyaning vaqtiga ta’sir qilgan.

Yig‘ilishda Eronning yuqori martabali amaldorlari ishtirok etishi kutilgan. Keyinchalik ba’zi yirik shaxslar bo‘yicha o‘lim haqidagi xabarlar tasdiqlangan.

Xususan, Muhammad Pakpurning halok bo‘lgani xabar berildi. Hujum aniq hisob-kitob asosida uyushtirilgan operatsiya sifatida tasvirlanmoqda.

Uzoq masofaga ucha oladigan va yuqori aniqlikda zarba beruvchi qurollar bilan jihozlangan samolyotlar jalb qilingan. Bu voqea Eron uchun kutilmagan va og‘ir zarba bo‘ldi.

Tehron urush xavfini anglagan bo‘lsa-da, tezkor va maqsadli hujum ssenariysiga qarshi yetarli darajada choralar ko‘rmagan. AQSh va Isroil razvedkasi bu borada muvaffaqiyatga erishgan.