Xitoy Eron yetakchisiga hujumni keskin qoraladi
Xitoy Tashqi ishlar vazirligi Eron oliy rahbari Ali Xominaiyning qasddan o‘ldirilishi holatiga keskin munosabat bildirdi va mintaqadagi harbiy harakatlarni darhol to‘xtatishga chaqirdi. Bu haqda Zamin.uz xabar berdi.
Rasmiy bayonotda Xitoy Xalq Respublikasi tashqi siyosat idorasi bu hujumni Eron davlat suverenitetiga qarshi jiddiy va xavfli harakat deb baholadi. Pekin rasmiylari, ayniqsa Yaqin Sharqda tinchlik va barqarorlikni saqlash uchun barcha manfaatdor tomonlarni vazminlikka, muammolarni diplomatik va siyosiy yo‘llar bilan hal etishga chaqirmoqda.
Xitoyning ta’kidlashicha, qurolli to‘qnashuvlarning kengayishi butun mintaqa xavfsizligiga jiddiy tahdid soladi va xalqaro barqarorlikka salbiy ta’sir ko‘rsatishi mumkin. Xitoylik tahlilchilar fikriga ko‘ra, hozirgi vaziyatda Eron tomonidan Isroil va AQSH harbiy kuchlariga nisbatan javob zarbalari berilishi ehtimoli yuqori.
Mutaxassislar Islom Respublikasining ichki siyosiy beqarorlikka yuz tutishiga ishonmaydi, chunki mamlakat ichida yagona va birlashgan muxolifat yo‘q. Shuningdek, AQSHning bu mojaroga chuqur aralashishdan manfaatdor emasligi qayd etilmoqda.
Ekspertlarning fikriga ko‘ra, Xitoy hozirgi bosqichda mojaroning harbiy yo‘l bilan hal qilinishini qo‘llab-quvvatlamaydi va o‘z tashqi siyosatini asosan muloqot, bosqichma-bosqich muzokaralar va xalqaro vositachilik orqali olib borishga intilmoqda.
