Eron hujumlarida qurbonlar soni 555 kishiga yetdi
Isroil va AQShning qo‘shma harbiy amaliyoti boshlanganidan beri Eronda halok bo‘lganlar soni 555 kishiga yetganini Eron Qizil Yarim Oy jamiyati xabar qildi. Bu haqda Zamin.uz xabar berdi.
Bayonotda ikki kun avval boshlangan hujumlar oqibatida mamlakat bo‘ylab ko‘plab insonlar hayotdan ko‘z yumgani aytilgan. Rasmiy ma’lumotlarga ko‘ra, qurbonlar soni 555 nafarni tashkil etmoqda.
Shu bilan birga, hujumlar natijasida 131 ta shaharda vayronagarchilik va turli darajadagi zarar kuzatilgani qayd etilgan. Infratuzilma obyektlari va turar joy binolariga jiddiy shikast yetgani ta’kidlanmoqda.
Avvalroq e’lon qilingan ma’lumotlarga ko‘ra, bir kun oldin hujumlar oqibatida 201 kishi halok bo‘lgani va 747 kishi jarohat olgani xabar qilingan edi. Qurbonlar soni ortib borayotgani qayd etilmoqda.
Bu voqealar ortidan xalqaro hamjamiyatda xavotir kuchaymoqda va vaziyatni tinch yo‘l bilan hal qilishga chaqiriqlar yangramoqda. Eron hukumati esa xalqaro tashkilotlardan yordam so‘ramoqda.
Voqealar rivoji kuzatilmoqda.
