Eron Xomanaiy vafoti ortidan muvaqqat kengash boshqaruvda

Eronning oliy rahbari Oyatulloh Ali Xomanaiy vafotidan so‘ng mamlakat boshqaruvi qanday amalga oshirilishi haqida ma’lumot berildi. Bu haqda Zamin.uz xabar berdi.

Eronning "Tasnim" axborot agentligi va boshqa xalqaro axborot vositalari xabariga ko‘ra, o‘tish davrida vakolatlar Eron Prezidenti Mas’ud Pezeshkiyon, sud hokimiyati rahbari G‘olyam Husayn Mohseni-Ejei va Konstitutsiya posbonlari kengashidan bir a’zo kirgan uch kishilik muvaqqat kengash tomonidan amalga oshiriladi. Ushbu tartib Eron Konstitutsiyasining 111-moddasida belgilangan.

Shuningdek, Xomanaiyning o‘limi munosabati bilan mamlakat bo‘ylab 40 kunlik motam va 7 kunlik dam olish e’lon qilingani xabar qilinmoqda. Mintaqada keskinlik va havo harakati cheklovlari ham kuzatilmoqda.

28 fevraldagi zarbalar va o‘zaro hujumlar fonida mintaqada havo qatnovi cheklangan va ayrim davlatlarda havo makoni vaqtincha yopilgan. Reuters tahlillariga ko‘ra, asosiy savol yangi rahbarni tanlash jarayoni va tizimning barqarorligi darajasida saqlanib qolishi bilan bog‘liq.

Ichki institutlar va xavfsizlik tizimining barqaror ishlashi hal qiluvchi omil sifatida qaralmoqda.