Eron Isroilga qarshi "Xaybar" raketalarini ishga soldi
Eron Islom inqilobi qo‘riqchilari korpusi (IIQK) o‘zining jamoatchilik bilan aloqalar bo‘limi orqali "Xaybar" turidagi raketalar qo‘llanilgan "o‘ninchi to‘lqin" hujumlari haqida ma’lumot berdi. Bu haqda Zamin.uz xabar berdi.
Ushbu hujumlar davomida Isroil hukumat majmuasi nishonga olingani ta’kidlangan. Bayonotda aytilishicha, "sionistik rejim" bosh vaziri idorasi va bu rejim harbiy-havo kuchlari qo‘mondoni joylashgan manzil "maqsadli va kutilmagan zarbalar"ga uchragan.
Eron qurolli kuchlari bu hujumlarni "og‘ir zarba" deb baholagan. IIQK bayonotida "o‘ninchi to‘lqin" doirasida "Xaybar" raketalari bilan "jiddiy zarbalar" berilgani yana bir bor ta’kidlangan.
Shuningdek, bayonotda Isroil bosh vazirining taqdiri "noma’lum holatda" ekani aytilgan. Ushbu iddaolar bo‘yicha hozircha mustaqil tasdiq mavjud emas.
Eron tomoni zarbalar asosan Isroilning "hukumat kampusi"ga qaratilganini ma’lum qildi va natijalar hamda qo‘shimcha ma’lumotlar keyinroq e’lon qilinishini bildirdi. Hozircha Isroil rasmiylari ushbu bayonot yuzasidan munosabat bildirmagan.
