Eron zarbasi AQShning Qatar radarini ishdan chiqardi
Gorizont Telegram kanali xabariga ko‘ra, Eron tomonidan amalga oshirilgan zarba natijasida Qatarda joylashgan AQShga tegishli strategik radar tizimi ishdan chiqqan. Bu haqda Zamin.uz xabar berdi.
Xabarda aytilishicha, Al-Udeid aviabazasi hududida joylashgan va qiymati taxminan 1 milliard dollar deb baholangan AN/FPS-132 rusumli radarga zarba berilgan. Ushbu radar Qatar hududida joylashgan bo‘lib, AQSh raketa mudofaasi tizimining muhim bo‘g‘inlaridan biri hisoblanadi.
Radar majmuasi Yevropadan Hind okeanigacha bo‘lgan katta hududni nazorat qila oladi. Ma’lumotlarga ko‘ra, ushbu turdagi radarlar dunyo bo‘yicha jami oltita bo‘lib, ular AQShdan tashqari Buyuk Britaniya va Grenlandiyada ham joylashgan.
Al-Udeid aviabazasidagi stansiya texnik jihatdan juda yuksak salohiyatga ega bo‘lib, Rossiya hududidan uchirilishi mumkin bo‘lgan raketalarni 5 ming kilometrdan ortiq masofada aniqlash imkoniyatiga ega. Shu sababli, Eron hududidan uchirilgan raketa yoki dronlarni kuzatish bu tizim uchun oddiy vazifa edi.
Ammo arzon dron orqali yuqori texnologiyali radarga zarba berilgani hodisaga bo‘lgan qiziqishni oshirmoqda.
