Tramp Eron bilan ziddiyatni kuchaytiruvchi nutq so‘zladi
Oq uy rahbari Donald Tramp Yaqin Sharqdagi keskin vaziyat boshlanganidan beri ilk bor kameralar qarshisida nutq so‘zladi. Bu haqda Zamin.uz xabar berdi.
Uning jonli efirdagi chiqishi dunyo e’tiborini yana Tehron va Vashington o‘rtasidagi ziddiyatga qaratdi. Tramp shu paytgacha ijtimoiy tarmoqlar va telefon orqali munosabat bildirib kelgan bo‘lsa, bu safar jurnalistlar bilan yuzma-yuz muloqot qildi.
Nutqida u harbiy amaliyotning zarurligini Eronning yadroviy intilishlari va raketa xavfi bilan izohladi. Trampning ta’kidlashicha, Eron Oq uyning ogohlantirishlarini e’tiborsiz qoldirib, Yevropa va Amerikaning asosiy hududlariga yetib boradigan qurollarni yaratish arafasida edi.
Biroq, Reuters agentligi ekspertlari prezidentning bu da’volarini biroz bo‘rttirilgan deb baholamoqda. Razvedka ma’lumotlariga ko‘ra, Eron bunday qudratga kamida 2035-yilda ega bo‘lishi mumkin edi.
Prezident Tramp o‘z ma’muriyati oldiga to‘rtta ustuvor vazifani qo‘ydi: raketa qudratini sindirish, dengiz flotiga zarba berish, yadroviy to‘siq o‘rnatish va moliyaviy blok qo‘yish. Qiziqarli jihati shundaki, Trampning nutqida "rejimni o‘zgartirish" haqida so‘z yo‘qligi Vashingtonning yakuniy maqsadlari hali ham noaniq ekanidan dalolat berishi mumkin.
Urush qancha davom etishi haqidagi savollarga Tramp o‘ziga xos uslubda javob berdi. U 4-5 haftalik muddatni prognoz qilganini, lekin rejadan oldinda ekanliklarini aytdi.
Zarur bo‘lsa, operatsiyani uzoqroq davom ettirishlarini ta’kidladi. Trampning fikricha, AQSHning dunyodagi eng qudratli armiyasi bor va ular albatta g‘alaba qozonishadi.
U Eronga qarshi "katta hujumlar to‘lqini" hali oldinda ekanini, zarurat tug‘ilsa, quruqlik qo‘shinlari kiritishdan ham qaytmasligini aytib o‘tdi. Sizningcha, Donald Tramp aytgan 4-5 haftalik muddatda Yaqin Sharqdagi ushbu mojaroni yakunlashning imkoni bormi?
