Isroildagi hujumlarda o‘zbekistonliklar zarar ko‘rmadi
O‘zbekistonning Isroildagi elchixonasi 2026-yil 4-mart holatiga ko‘ra, Isroil hududiga qilingan raketa hujumlari natijasida O‘zbekiston fuqarolari zarar ko‘rmaganini ma’lum qildi. Bu haqda Zamin.uz xabar berdi.
Bu haqda elchixona matbuot xizmati axborot berdi. Rasmiy ma’lumotda elchixona vaziyatni doimiy ravishda kuzatib borayotgani aytilgan.
Shuningdek, elchixona xodimlari Isroilning tegishli davlat organlari bilan muntazam aloqada ekani qayd etilgan. Elchixona ma’lumotiga ko‘ra, 28-fevraldan beri "Ishonch telefoni" va elektron pochta orqali Isroilda bo‘lib turgan O‘zbekiston fuqarolaridan turli konsullik masalalari bo‘yicha murojaatlar kelib tushgan.
Xavfsizlik holati yomonlashayotganini inobatga olib, elchixona vatandoshlarimizga konsullik bo‘limiga faqat zarur ehtiyoj bo‘lganda murojaat qilishni tavsiya etmoqda. Zaruratsiz hollarda konsullikka tashrif buyurishdan tiyilish so‘ralgan.
