Yaponiyada "Tobutda meditatsiya" tez ommalashmoqda

Yaponiyada odamlarni ajablantirayotgan yangi dam olish usuli tezda ommalashmoqda. Bu haqda Zamin.uz xabar berdi.

Endilikda ba’zi insonlar hayot haqida chuqurroq o‘ylash, ruhiy yengillik his qilish va o‘zlarini qayta tiklash maqsadida tobut ichida meditatsiya qilishni boshlashdi. Bu haqda New York Post ma’lumot bergan.

"Tobutda yotish" deb nomlangan bu xizmat dastlab Chiba prefekturasidagi dafn marosimi uyi tomonidan taklif qilingan edi. Biroq bu g‘oya odamlar orasida katta qiziqish uyg‘otgach, tez orada boshqa hududlarda ham tarqaldi.

Amaliyotning asosiy maqsadi – inson o‘limni ramziy ma’noda his qilib, hayotga boshqacha nazar bilan qarashi. Qatnashchilar taxminan 30 daqiqa davomida tobut ichida yotadilar: sukutda, xotirjam holda dam olib, o‘z hayotlaridagi muhim qarorlar va qadriyatlar haqida o‘ylaydilar.

Tokiodagi ba’zi markazlar esa bundan ham yumshoqroq formatni taklif etmoqda: meditatsiya uchun maxsus tayyorlangan, qulay dizayndagi "yoqimli tobutlar". Mijozlar o‘z xohishlariga ko‘ra, tobut eshigini ochiq yoki yopiq qoldirishlari, sokin musiqa tinglashlari, shiftidagi videoni tomosha qilishlari yoki umuman to‘liq jimlikda qolishlari mumkin.

Mutaxassislar bu tendensiyani yaponlarning "kuyo" an’anasi bilan uyg‘unligini ta’kidlashmoqda. Ushbu marosim va xotira tadbirlari insonlarga hayotning o‘tkinchi ekanligini eslatish, bugungi kunni qadrlashga undashga qaratilgan.

Loyiha mualliflari ham maqsad odamlarni qo‘rqitish emas, balki hayotni chuqurroq tushunishga va qadrlashga undash ekanini alohida ta’kidlashgan.