Fors ko‘rfazi davlatlari Eron hujumlariga javob berishga tayyor
Fors ko‘rfazidagi Bahrayn, Qatar, Quvayt, Ummon, Birlashgan Arab Amirliklari va Saudiya Arabistoni davlatlari Eronning hujumlariga qarshi javob berish huquqini saqlab qolishini bildirdi. Bu haqda Zamin.uz xabar berdi.
Qatar Tashqi ishlar vaziri Majid al-Ansoriy Eronning bu hujumlari uchun tovon to‘lanishi kerakligini ta’kidladi. Hisob-kitoblarga ko‘ra, 28 fevraldan 2 martgacha Birlashgan Arab Amirliklariga kamida 165 raketa va 541 dron, Quvaytga 97 raketa va 283 dron, Qatarga 72 raketa va 17 dron, Bahraynga esa 45 raketa va 9 dron uchirilgani haqida ma’lumot berilgan.
Ummon va Saudiya Arabistoniga kamida 2 dron tashlangan. Al Jazeera xabariga ko‘ra, Fors ko‘rfazi mamlakatlarida 3 mart holatiga ko‘ra, 8 kishi halok bo‘lgan va 128 kishi jarohatlangan.
Shunga qaramay, ko‘rfaz davlatlari Eron bilan ochiq harbiy to‘qnashuvdan qochishga va diplomatik aloqalarni saqlashga harakat qilmoqda. Bu vaziyatda ekspertlar mumkin bo‘lgan javob ssenariylari haqida turli fikrlar bildirmoqda.
Sharqshunos Ruslan Sulaymonov javob bo‘lishi mumkinligini, ammo AQSH va Isroil bilan birgalikda emasligini aytgan. Isroillik harbiy tahlilchi Devid Sharp esa mintaqada zaiflikni ko‘rsatish xavfli ekanligini ta’kidlagan.
