Isroil elchisi Eronning harbiy tahdidini tanqid qildi
Gideon Lastig, Isroilning O‘zbekistondagi elchisi, mamlakati nega AQSH bilan birga Eronga qarshi harakat qilayotganiga aniqlik kiritdi. Bu haqda Zamin.uz xabar berdi.
Elchi ta’kidlashicha, so‘nggi bir yil davomida Eron o‘z yadroviy salohiyatini tez sur’atlarda oshirish va ballistik raketalar ishlab chiqarish hajmini kengaytirish ustida tinimsiz ish olib borgan. Bu harbiy imkoniyatlar maxsus yer osti inshootlariga ko‘chirilmoqda.
Ushbu obyektlar zarba berish qiyin bo‘lgan, yuqori darajada himoyalangan va deyarli daxlsiz hududlar hisoblanadi. Elchining aytishicha, oxirgi 48 soat ichida Eron faqat Isroilga emas, balki mintaqadagi boshqa davlatlarga ham raketa salohiyatidan foydalangan.
Xususan, Fors ko‘rfazidagi arab davlatlari ham nishonga olingan. "So‘nggi ikki kun ichida Eron kamida yetti davlatga zarba berdi.
Bu esa raketa imkoniyatlarining haqiqiy tahdid ekanini ko‘rsatib turibdi", — dedi elchi. Shuningdek, u vaziyatga Hizbulloh ham aralashganini ta’kidladi.
Uning so‘zlariga ko‘ra, Livanda faoliyat yurituvchi ushbu guruh Isroilga qarshi hujum qilishga qaror qilgan. "Afsuski, Livandagi Hizbulloh o‘zini Livan xalqining himoyachisi sifatida ko‘rsatsa-da, aslida u Erondagi oyatullohlar rejimi qo‘lidagi vosita, ya’ni siyosiy va harbiy qurol vazifasini bajarmoqda", — dedi Isroil elchisi.
