Rossiya Eron inqirozidan xavotirda: Putinning pozitsiyasi qanday?
Kreml atrofidagi mafkuraviy doiralar Tehrondagi inqirozga oddiygina "mintaqadagi ittifoqchi zaiflashmoqda" deb qarashdan ko‘ra, kengroq xavotir bilan yondashmoqda. Bu haqda Zamin.uz xabar berdi.
Ular Erondagi vaziyat bir kun kelib Rossiyaga ham ta’sir qilishi mumkinligini muhokama qilmoqda. Prezident Putinning Eron oliy rahbariga qilingan suiqasdni keskin qoralashi ham shu xavotirning bir qismi sifatida ko‘rilmoqda.
Kun.uz saytining "Geosiyosat" dasturida siyosatshunoslar Rossiyaning bu masalaga munosabati va uning sabablarini tahlil qilishdi. Kamoliddin Rabbimovning ta’kidlashicha, Putinning bu boradagi pozitsiyasi yangilik emas.
2025-yilda jurnalistlar bilan uchrashuvda unga "agar imom Xomanaiy AQSH yoki Isroil tomonidan o‘ldirilsa, qanday baholaysiz?" degan savol berilganida, Putin buni izohlashni xohlamasligini bildirgan. Rabbimovga ko‘ra, Putinning dunyoqarashida urush mumkin, lekin davlat rahbarini nishonga olish qabul qilib bo‘lmaydigan chiziq.
Bu nuqtayi nazardan, Eron rahbariyatiga nisbatan tahdidlar Kreml uchun shunchaki tashqi siyosat masalasi emas, balki "ertaga kimga navbat?" degan savolni uyg‘otuvchi hodisa. Aleksandr Duginning "agar Eron yiqilsa, keyin Rossiya navbatda" degan ogohlantirishi ham bu fikrni tasdiqlaydi.
Dugin rasmiy lavozimda bo‘lmasa-da, Kreml atrofidagi mafkuraviy muhitga yaqin shaxs sifatida tanilgan. Mintaqaviy manfaatlar nuqtai nazaridan Eronning zaiflashuvi Isroil uchun qulay, chunki Tel-Aviv Tehronni asosiy xavfsizlik tahdidi sifatida ko‘radi.
Global miqyosda esa AQSH va Xitoy raqobati kuchaygan bir paytda, Rossiya va Eron Pekin uchun muhim hamkorlar sanaladi. Kuba va Venesueladagi iqtisodiy qiyinchiliklar ham bu kontekstda e’tiborga olinmoqda.
Asosiy muammo shundaki, Rossiya Eronni to‘liq qo‘llab-quvvatlashga qodir emas, lekin vaziyatni bezovtalik bilan kuzatmoqda. Ukrainadagi urush Rossiya resurslarini cheklagan, yangi geosiyosiy silkinish esa Kreml uchun yana bir qiyin vaziyatni anglatadi.
Shuhrat Rasul Rossiya jamoatchiligida muhokama qilinayotgan yana bir epizodga e’tibor qaratdi.
