Eronning Yaqin Sharqqa hujumlari kuchaymoqda
Yaqin Sharqda davom etayotgan harbiy to‘qnashuvlar yangi bosqichga ko‘tarildi. Bu haqda Zamin.uz xabar berdi.
Eron bir vaqtning o‘zida bir nechta davlat hududiga dron va raketalar yordamida hujumlar uyushtira boshladi. Xususan, Bahrayn poytaxti Manamada joylashgan "Financial Harbour Towers" majmuasiga hujum uyushtirildi.
Ma’lumotlarga ko‘ra, ushbu binoda Isroil elchixonasi joylashgan bo‘lib, hujum qiluvchi dronlardan biri nishonga yetmasdan avvalroq yo‘q qilingan. Bundan tashqari, Saudiya Arabistoni mudofaa tizimlari Al-Xarj viloyati va Ar-Riyod atrofida bir nechta qanotli raketa va dronlarni urib tushirdi.
Qatarda ham vaziyat jiddiylashgan. Al-Udayd harbiy bazasiga qaratilgan hujum havo mudofaa kuchlari tomonidan bartaraf etilgan.
Ushbu hududda AQSh harbiy obyektlari joylashgani sababli xavfsizlik choralari kuchaytirildi va Doxa aholisiga uydan chiqmaslik tavsiya qilindi. Mintaqadagi urush kengayib, Turkiya va Ozarbayjon kabi davlatlarga ham ta’sir ko‘rsata boshladi.
Ushbu voqealar fonida Yevropa Ittifoqi rahbarlari Bryusselda favqulodda yig‘ilish o‘tkazdi. Yevropa Ittifoqining tashqi siyosat bo‘yicha vakili Kaya Kallas va boshqa yetakchilar Fors ko‘rfazi hamkorlik kengashi vakillari bilan muzokaralar olib borib, Eronning harakatlarini qoraladi va mintaqa davlatlarini qo‘llab-quvvatlashini bildirdi.
