Neft narxi oshishda davom etmoqda: Yaqin Sharq ziddiyatlari sabab
Jahon bozorida energiya resurslari narxi yana o‘sishda davom etmoqda. Bu haqda Zamin.uz xabar berdi.
Xususan, Brent markali neftning bir barreli 87 dollardan oshdi. Bu ko‘rsatkich 2024 yil iyul oyidan beri kuzatilayotgan eng yuqori darajadir.
London birjasi ma’lumotlariga ko‘ra, hafta boshidan beri neft narxi taxminan 18 foizga oshgan. Narxlarning bunday tez o‘sishiga Yaqin Sharqdagi harbiy ziddiyatlar sabab bo‘lmoqda.
AQSH va Isroilning Eron hududiga bergan zarbalari, shuningdek, Tehronning mintaqadagi ob’ektlarga hujumlari vaziyatni yanada murakkablashtirmoqda. Ayniqsa, Eronning dunyo neft savdosida muhim ahamiyatga ega bo‘lgan Hurmuz bo‘g‘ozini nazoratga olgani xavotirlarni kuchaytirmoqda.
Tahlilchilar fikricha, agar dengiz yo‘lagidagi vaziyat barqarorlashmasa, neft narxi 100 dollardan oshib ketishi mumkin. Shunga qaramay, Goldman Sachs banki ikkinchi chorak uchun o‘rtacha narxni 76 dollar atrofida bo‘lishini prognoz qilmoqda.
Mintaqadagi beqarorlik fonida Rossiyaning Urals markali neft narxi ham ko‘tarilib, 49 dollardan oshdi. Mutaxassislar Yaqin Sharqdagi harbiy harakatlar davom etsa, global energetika bozorida narxlar o‘zgarishi mumkinligidan ogohlantirmoqda.
Hozircha investorlar vaziyatning rivojlanishini diqqat bilan kuzatib bormoqda.
