Yaqin Sharqdagi mojarolar Dubay oltin bozoriga ta’sir qildi

Yaqin Sharqdagi vaziyatning keskinlashuvi va Eron bilan bog‘liq harbiy to‘qnashuvlar Dubaydagi oltin bozoriga sezilarli ta’sir ko‘rsatmoqda. Bu haqda Zamin.uz xabar berdi.

Aviaparvozlarning to‘xtatilishi va xavfsizlik choralarining kuchaytirilishi tufayli qimmatbaho metallarni bu yirik savdo markazidan olib chiqish qiyinlashgan. Shuning uchun treyderlar oltinni jahon bozoridagi narxidan 30 dollargacha arzonroq sotishga majbur bo‘lmoqda.

Dubay dunyo bo‘ylab oltin eksporti va tranziti uchun muhim markazlardan biri sanaladi. Ammo mintaqadagi urush sababli havo yo‘llarining yopilishi logistikani izdan chiqardi.

Oltin odatda yo‘lovchi samolyotlarining yuk bo‘limlarida tashilgani sababli, parvozlar bekor qilinganida yuklar aeroportlarda qolib ketmoqda. Quruqlik orqali tashish esa xavfsizlik masalalari tufayli deyarli amalga oshirilmayapti.

Bu holat Hindiston kabi oltin yetkazib beriladigan yirik bozorlarda ham sezila boshladi. Hindistonlik tahlilchilarning fikricha, hozircha zaxiralar yetarli, lekin logistik uzilishlar uzoq davom etsa, vaziyat murakkablashishi mumkin.

Xomashyo yetkazib berishdagi muammolar ishlab chiqarish xarajatlarini 70 foizgacha oshirib yuborgan. Mutaxassislar Yaqin Sharqdagi beqarorlikning qimmatbaho metallar savdosiga uzoq muddatli salbiy ta’sir ko‘rsatishi mumkinligidan xavotirda.

Hozir oltin narxlarida o‘zgarish kuzatilayotgan bo‘lsa-da, logistikadagi muammolar savdogarlar uchun jiddiy muammo bo‘lib qolmoqda.