Eron hujumi AQSHning THAAD radarini vayron qildi
Yaqin Sharqdagi vaziyat keskinlashgan bir paytda, Eron tomonidan amalga oshirilgan raketa hujumi AQSHning mintaqadagi harbiy infratuzilmasiga katta zarar yetkazdi. Bu haqda Zamin.uz xabar berdi.
CNNning tahlillariga ko‘ra, Iordaniyadagi Muvvafaq as-Salti aviabazasida joylashgan THAAD havo mudofaa tizimining asosiy radari butunlay vayron bo‘lgan. Sun’iy yo‘ldoshdan olingan tasvirlar ushbu qimmatbaho uskunaning yo‘q qilinganini tasdiqlaydi.
Mutaxassislar, bu radar THAAD majmuasining yuragi ekanini ta’kidlashmoqda. Uning ishdan chiqishi butun tizimni "ko‘r" holatga keltirib, ballistik raketalarni aniqlash va ularni tutib olish imkoniyatini sezilarli darajada kamaytiradi.
Eronning bu hujumi yangi harbiy strategiyaning belgisidir. Endilikda hujumlar bevosita raketalarni emas, balki ularni boshqaruvchi va kuzatuvchi sensor tizimlarini nishonga olmoqda.
Bu AQSH mudofaa tizimining samaradorligini pasaytirishga qaratilgan xavfli taktikadir. Hozirda AQSH ixtiyorida atigi 8 ta THAAD batareyasi borligi inobatga olinsa, vayron bo‘lgan radarni almashtirish boshqa hududlardagi xavfsizlik tizimlarini qayta taqsimlashni talab qiladi.
Avvalroq Birlashgan Arab Amirliklaridagi THAAD infratuzilmasiga ham zarbalar berilgani haqida xabarlar tarqalgan edi. Eronning uzoq masofadan aniq zarba bera olishi mintaqadagi harbiy muvozanatga jiddiy ta’sir ko‘rsatishi mumkin.
